ક્લીપન : ભૂસંચલનજન્ય વિવૃતિઓ : સ્તરવિદ્યાની ર્દષ્ટિએ અને સ્તરાનુક્રમ મુજબ વ્યસ્ત રીતે ગોઠવાઈ ગયેલી ભેખડ-સ્વરૂપની ખડકવિવૃતિ. અતિધસારા(overthrust)-પટના કે ‘નૅપ’ના ધસારા બાદ શેષ રહી ગયેલા ખડકવિભાગો પોતાની નીચેના તળખડક-વિભાગોથી ધસારા-સપાટી દ્વારા સ્તરાનુક્રમની ર્દષ્ટિએ જુદા પડી આવે છે. આ પ્રકારની વિવૃતિઓમાં નવા સમયના ખડકસ્તરો ઉપર હોવા જોઈએ તેને બદલે નીચે હોય છે; જ્યારે જૂના સમયના ખડકસ્તરો ક્રમમાં ઉપર તરફ જોવા મળે છે. સ્વિસ આલ્પ્સમાં આવી વિવૃતિઓ મળી રહે છે. હિમાલય વિસ્તારમાં સિમલા જવાના માર્ગ પર સોલોનમાં જોવા મળતી ભેખડ-ક્લીપનમાં તૃતીય જીવયુગના ખડકસ્તરોની ઉપર મધ્યજીવયુગના પર્મો-કાર્બોનિફેરસ ખડકસ્તરો ગોઠવાયેલા નજરે પડે છે.
ગિરીશભાઈ પંડ્યા