પિયો ગોરી (1946) : કવિ-નાટ્યકાર કૃષ્ણલાલ શ્રીધરાણીનું ચાર દૃશ્યોનું પ્રલંબ એકાંકી. પ્રસંગો અને પાત્રોથી રસપ્રદ બનતી સુંદર વસ્તુગૂંથણી ધરાવતા આ એકાંકીમાં પ્રેમ અને શંકાના વાતાવરણમાં પતિ પોતાની નટી-પત્નીને ખરેખરું વિષપાન કરાવે છે; વાસ્તવિકતા અને આભાસની મર્યાદારેખા એ રીતે વળોટી જતી એ ઘટના અને એની ડિઝાઇન કવિ શ્રીધરાણીના આ નાટ્યને ખૂબ રંગભૂમિક્ષમ અને અભિનેય બનાવે છે; અને દૃશ્યો બદલાયાં છતાં એની નાટ્યાત્મકતા ઢીલી પડતી નથી. ગુજરાતી મૌલિક એકાંકીઓમાં ખૂબ નોંધપાત્ર ગણાય એવી આ સુરેખ કૃતિ છે.
હસમુખ બારાડી