રામ્ફાલ, શ્રીદથ સુરેન્દ્રનાથ (સર)

રામ્ફાલ, શ્રીદથ સુરેન્દ્રનાથ (સર) (જ. 1928, ગિયાના) : ગિયાનાના રાજકારણી. સોની રામ્ફાલ તરીકે તેઓ જાણીતા બન્યા હતા. વ્યવસાય વકીલાતનો. જોકે મુત્સદ્દી તરીકે વિશેષ જાણીતા છે.

લંડનની કિંગ્ઝ કૉલેજમાં કાયદાશાસ્ત્રનો અભ્યાસ કર્યો અને 1951માં વકીલાતનો પ્રારંભ કર્યો. તે પછી ગિયાનામાં પાછા ફરી 1952થી વિવિધ સ્તરે જવાબદારીભર્યાં રાજકીય સ્થાનો શોભાવ્યાં. 1972માં ગિયાનાના વિદેશમંત્રી અને 1973માં કાયદામંત્રી બન્યા. 1975થી ’90 દરમિયાન કૉમનવેલ્થના મહામંત્રી તરીકે તેમણે કામગીરી બજાવી હતી.

રક્ષા મ. વ્યાસ