ભૂ-કિરીટ (Geo-corona) : પૃથ્વીના વાયુમંડળનો સહુથી બહારનો ભાગ કે ઘટક. આ ભાગ મુખ્યત્વે હાઇડ્રોજન અને જૂજ માત્રામાં હિલિયમ વાયુ-વાદળના પ્રભામંડળ (halo) વડે બનેલો માનવામાં આવે છે. તેનો વિસ્તાર 50,000 કિમી.થી પણ વધુ અંદાજવામાં આવ્યો છે. આ ભૂ-કિરીટ, સૂર્યના લાઇમૅન-આલ્ફા વિકિરણ(Lyman-alpha radiation)નું પ્રકીર્ણન કરે છે, જેને કારણે દીપ્તિ ઉદભવે છે. આ દીપ્તિ પૃથ્વીના દીર્ઘ અંતર સુદૂર-પારજાંબલી (long-distance-far-ultraviolet) ફોટોગ્રાફમાં જોઈ શકાય છે. આ દીપ્તિ સુદૂર-પારજાંબલી ખગોલીય નિરીક્ષણોમાં વિઘ્નરૂપ પણ થાય છે.
સુશ્રુત પટેલ