બુશનેલ, નૉલન (જ. 1943, ક્લ્પિર ફિલ્ડ, ઉટાહ, યુ.એસ.) : વીડિયો-ગેમના શોધક. તેઓ ઇજનેરીના વિદ્યાર્થી હતા અને ફાજલ સમયમાં મનોરંજન પાર્કમાં નોકરી કરતા હતા. કમ્પ્યૂટર-ગેમ તે વખતે કૉલેજોના મેનફ્રેમ કમ્પ્યૂટર પર જ સુલભ હતી. એ રમતને મનોરંજન અને વેપારી સ્થળોએ સુલભ કરી આપવાનો તેમણે નિર્ણય કર્યો. 1971માં માઇક્રોપ્રોસેસર ચિપ સૌપ્રથમ વાર મળતી થઈ. તે પછી તેમણે પોતાની જ કંપની સ્થાપી. ત્યાં 1973માં સાદી ટેનિસ રમતની ટેકનિક પ્રયોજી ‘પાગ’ નામની રમત તૈયાર કરી. એ રમત ટીવી સેટ સાથે જોડી શકાતી હતી. એ રીતે તેઓ વીડિયો-ગેમના પ્રણેતા તરીકે જાણીતા થયા.
મહેશ ચોકસી