ફિલ્મોત્સવ નિર્દેશાલય (Directorate of Film Festival)

ફિલ્મોત્સવ નિર્દેશાલય (Directorate of Film Festival) : દેશમાં અર્થપૂર્ણ અને સારાં ચલચિત્રોને પ્રોત્સાહન આપવા અને આ ક્ષેત્રની પ્રતિભાઓને પ્રોત્સાહિત કરવાના હેતુસર ભારત સરકારે સ્થાપેલું નિર્દેશાલય. માહિતી અને પ્રસારણ મંત્રાલય અંતર્ગત ફિલ્મોત્સવ નિર્દેશાલયની સ્થાપના 1973માં કરવામાં આવી. આ સંસ્થા દેશમાં નિર્માણ પામતાં સારાં ચલચિત્રોનો દર વર્ષે રાષ્ટ્રીય મહોત્સવ યોજે છે અને દર વર્ષે ભારતના આંતરરાષ્ટ્રીય ફિલ્મોત્સવનું આયોજન કરે છે. એક પરામર્શક સમિતિ આ નિર્દેશાલયની પ્રવૃત્તિઓ અને નીતિ નિર્ધારિત કરે છે. ફિલ્મકળાની નિપુણ વ્યક્તિઓ આ સમિતિના સભ્યો હોય છે. વિદેશોમાં યોજાતા આંતરરાષ્ટ્રીય ફિલ્મોત્સવોમાં ભાગ લેવા માટે ભારતીય ચિત્રો મોકલવાનું કામ પણ આ સંસ્થા કરે છે.

આ સંસ્થા દ્વારા આંતરરાષ્ટ્રીય ફિલ્મ ફેસ્ટીવલોનું પણ દર વર્ષે આયોજન થાય છે. પહેલાં દર બે વર્ષે એક ફેસ્ટીવલ દિલ્હીમાં યોજાતો હતો તથા તે પછીના વર્ષે અલગ અલગ જગ્યાએ તેનું આયોજન થતું.  છેલ્લા કેટલાક વર્ષોથી ભારતનો આંતરરાષ્ટ્રીય ફિલ્મ મહોત્સવ ફક્ત ગોવામાં જ યોજાય છે.

ભારતની ફિલ્મો માટેના રાષ્ટ્રીય પારિતોષિકો  (નેશનલ ફિલ્મ ઍવૉર્ડ)નું સંચાલન પણ આજ સંસ્થા દ્વારા થાય છે.

હાલ આ સંસ્થાનું મુખ્યાલય દિલ્હીમાં આવેલ શીરી ફોર્ટ ઓડિટોરિયમમાં કાર્યરત છે.

હરસુખ થાનકી