લૉરેન્સ, થૉમસ (જ. 1769, બ્રિસ્ટોલ, બ્રિટન; અ. 1830) : બ્રિટિશ વ્યક્તિચિત્રકાર. 1787માં તે લંડનની રૉયલ એકૅડેમીમાં ચિત્રકલાના વિદ્યાર્થી તરીકે દાખલ થયા. એ જ વર્ષે પોતાનું પ્રથમ વૈયક્તિક પ્રદર્શન કર્યું. અભ્યાસ પૂરો થતાં, 1791માં તે રૉયલ એકૅડેમીના સભ્ય બન્યા.
થૉમસ લૉરેન્સે ચીતરેલું ચિત્ર ‘ક્વીન શાર્લોટી’
1792માં વ્યક્તિચિત્રકાર સર જોશુઆ રેનૉલ્ડ્ઝનું અવસાન થતાં રાજાના ખાસ ચિત્રકારના ખાલી પડેલા પદ ‘પેઇન્ટર ટુ ધ કિન્ગ’ ઉપર તેમની નિમણૂક થઈ. 1815માં તેમને રાજાએ ‘નાઇટહૂડ’ આપ્યું. 1820માં તે રૉયલ એકૅડેમીના પ્રમુખ બન્યા. એમના શ્રેષ્ઠ વ્યક્તિચિત્રોમાં નીચેનાંનો સમાવેશ થાય છે. (1) મિસ ફેરેન, (2) ક્વીન શાર્લોટી, (3) ધ આર્ચડ્યૂક્ ઑવ્ ઑસ્ટ્રિયા અને (4) પોપ પાયસ સાતમો.
અમિતાભ મડિયા