કારોતો, જિયાન ફ્રાન્ચેસ્કો

કારોતો, જિયાન ફ્રાન્ચેસ્કો (જ. આશરે 1480, વેરોના, ઇટાલી; અ. 1555, વેનિસ, ઇટાલી) : રેનેસાંસની વેનેશિયન શાખાનો ચિત્રકાર.

તરુણાવસ્થામાં કારોતો માન્તુઆમાં આન્દ્રેઆ માન્તેન્યા(Andrea Mantegna)ની ચિત્રશૈલીના પ્રભાવ હેઠળ આવ્યો. વેરોના પાછા જઈને તેણે તેની શ્રેષ્ઠ ચિત્રકૃતિઓ સર્જી : ‘એન્ટુમ્મેન્ટ’, ‘મેડૉના ઇન ગ્લોરી વિથ સેન્ટ્સ’, અને ‘સેન્ટ ઉર્સુલા’. તેનાં ચિત્રોમાંની પશ્ચાદભૂમાં ચિત્રિત નિસર્ગ લિયૉનાર્દો દ વિન્ચીના ચિત્રોમાંની પશ્ચાદભૂમાં ચિત્રિત નિસર્ગ જેવી દેખાય છે. એનાં ચિત્રોમાં આ ઉપરાંત સાંઝિયો રફાયેલનો પ્રભાવ પણ જોવા મળે છે.

અમિતાભ મડિયા