એમુંડસન અખાત

એમુંડસન અખાત : કૅનેડાના વાયવ્ય પ્રદેશમાં, મૅકેન્ઝી અને ફ્રેન્કલીન જિલ્લાઓ વચ્ચે આવેલો અખાત. આર્કટિક મહાસાગરના બ્યૂફૉર્ટ સમુદ્રની અગ્નિ દિશામાં 400 કિમી. જેટલો વિસ્તરેલો છે. કૅનેડાની ઉત્તરમાં આવેલા બૅન્કસ દ્વીપ તથા મુખ્ય ભૂમિને તે અલગ પાડે છે. બ્રિટિશ સાહસવીર રૉબર્ટ મૅક્લુઅરે 1850માં આ અખાતના પ્રથમ પ્રવાસીઓના જૂથનું નેતૃત્વ કરીને પશ્ચિમ તરફના છેડામાં પ્રવેશ કર્યો હતો. પરંતુ આ અખાતની વાયવ્ય દિશા તરફ પ્રથમ અભિયાન (expedition) નૉર્વેના રોઆલ્ડ એમુંડસને (1872-1928) હાથ ધર્યું હતું તેથી આ અખાત ‘એમુંડસન અખાત’ નામથી ઓળખાય છે.

બાળકૃષ્ણ માધવરાવ મૂળે